मेचीनगर । मेचीनगरमा पहिलो पटक रेपिड चेस च्याम्पियनसीप प्रतियोगिता आयोजना हुने भएको छ । नाइट चेस क्लब काँकरभिट्टाको आयोजनामा यही पुस ५ गते प्रथम केसीसी प्रेसिडेन्ट खुला रेपिड चेस च्याम्पियनसीप प्रतियोगिता हुने भएको हो ।
प्रतियोगिताबारे जानकारी दिन क्लबले पत्रकार सम्मेलन आयोजना गरेको थियो । क्लबका अध्यक्ष विश्वविजय घिमिरेले नयाँ प्रतिभाको प्रोत्साहन र उत्पादनमा योगदान पुर्याउने उद्देश्यले प्रतियोगिता आयोजना गरिएको बताउनुभयो ।
क्लबका वरिष्ठ उपाध्यक्ष तथा टुर्नामेन्ट डाइरेक्टर राजु पौडेलका अनुसार प्रतियोगिता विभिन्न क्याटोगोरीमा सञ्चालन हुनेछ भने विजेतालाई १ हजार ५ सयदेखि १० हजार रुपैयाँसम्म नगद पुरस्कार प्रदान गरिनेछ ।
काँकरभिट्टामा पहिलो पटक आयोजना हुन लागेको यस प्रतियोगितामा भारतलगायत अन्य देशबाट पनि खेलाडीको सहभागिता रहने आयोजकले जनाएको छ । प्रतियोगिता संयोजक तथा क्लबका पूर्व अध्यक्ष शेरबहादुर बस्नेतले विशेष गरी कोशी प्रदेशलाई लक्षित गरी प्रतियोगिताको तयारी गरिएको जानकारी दिनुभयो ।
खेल संयोजक बसन्त श्रेष्ठका अनुसार प्रतियोगितामा विभिन्न चरणमार्फत कुल २१ जना खेलाडीलाई नगद तथा प्रमाणपत्रद्वारा पुरस्कृत गरिनेछ ।
कार्यक्रमका प्रमुख अतिथि तथा मेचीनगर वडा नम्बर ६ का अध्यक्ष ललित तामाङले यस्ता प्रतियोगिताले मेचीनगरको मान, सम्मान र गरिमा बढाउने भन्दै सबैको सहयोग आवश्यक रहेको बताउनुभयो । उहाँले नाइट चेस क्लबले यसअघि राष्ट्रिय तथा अन्तर्राष्ट्रियस्तरका प्रतियोगिता सफलतापूर्वक सम्पन्न गर्दै आएको र नव प्रतिभा उत्पादनमा उल्लेखनीय योगदान पुर्याएको स्मरण गराउनुभयो ।
क्लबका महासचिव राजेश राउतका अनुसार प्रतियोगितामा पहिलो हुनेलाई १० हजार, दोस्रो हुनेलाई ७ हजार, तेस्रो हुनेलाई ५ हजार र चौथो हुनेलाई ४ हजार रुपैयाँ नगद तथा प्रमाणपत्र प्रदान गरिनेछ । उत्कृष्ट १५ औँ स्थानसम्मका खेलाडी तथा क्याटोगोरी अन्तर्गत ६ जनालाई पुरस्कृत गरिनेछ ।
प्रतियोगिताका लागि कुल ६० हजार ५ सय रुपैयाँ पुरस्कार रकम विनियोजन गरिएको छ । प्रतियोगिता यही पुस ५ गते शनिबार काँकरभिट्टा क्याम्पसको हलमा आयोजना हुनेछ ।
Nepali