झापा–५ मा नेकपा (माओवादी केन्द्र) ले युवा नेता संजय राईलाई उम्मेदवार बनाउने निश्चित भएको छ। पार्टीका अनुसार राईले ‘गुलाफ’ चुनाव चिह्न लिएर निर्वाचन मैदानमा उत्रिनेछन्। उनको मनोनयन दर्ता भोलि हुने बताइएको छ।
माओवादी पक्षले संजय राईलाई देशभक्त, जनप्रिय र संघर्षशील युवा नेताका रूपमा प्रस्तुत गर्दै पछिल्ला एक दशकदेखि झापामा राष्ट्रघात र जनघातविरुद्ध निरन्तर संघर्ष गर्दै आएको दाबी गरेको छ। पार्टी निकट स्रोतका अनुसार राज्यद्वारा गरिएको दमन सहँदै उनले जनताको पक्षमा राजनीतिक गतिविधि अगाडि बढाएका छन्।
पार्टीले आगामी निर्वाचनलाई पुराना सत्ताधारी शक्तिविरुद्धको निर्णायक संघर्षका रूपमा व्याख्या गरेको छ। “एल्गोरिदम र भाइरल राजनीतिभन्दा बाहिर रहेर वास्तविक जनप्रतिनिधि चुन्ने समय आएको छ,” माओवादी नेताहरूको भनाइ छ।
संजय राईलाई विजयी गराउने उद्देश्यसहित भोलिदेखि चुनावी अभियान औपचारिक रूपमा सुरु गरिने जनाइएको छ। पार्टीले डेढ महिनाको चुनावी समय जनचेतना फैलाउन पर्याप्त रहेको दाबी गर्दै झापा–५ मा जनमत परिवर्तन हुने विश्वास व्यक्त गरेको छ।
Nepali