पेट्रोल, डिजेल र मट्टीतेलमा मूल्य घट्यो, ग्यास र हवाई इन्धन महँगियो

झापा । नेपाल आयल निगमले पेट्रोलियम पदार्थको मूल्य समायोजन गर्दै पेट्रोल, डिजेल र मट्टीतेलको मूल्य घटाएको छ भने एलपी ग्यास र हवाई इन्धनको मूल्य बढाएको छ।

निगम सञ्चालक समितिको निर्णयअनुसार नयाँ मूल्य वैशाख १८ गते बिहान १ बजेदेखि लागू हुने जनाएको छ।
समायोजन अनुसार पेट्रोलमा प्रतिलिटर २ रुपैयाँ, डिजेल तथा मट्टीतेलमा प्रतिलिटर १२ रुपैयाँका दरले मूल्य घटाइएको छ। तर, खाना पकाउने एलपी ग्यासमा प्रति सिलिन्डर १५० रुपैयाँले वृद्धि गरिएको छ।

त्यसैगरी, हवाई इन्धन (आन्तरिक तथा अन्तर्राष्ट्रिय) दुवैको मूल्य पनि बढाइएको निगमले जनाएको छ। अन्तर्राष्ट्रिय बजारमा मूल्यवृद्धि भएकै कारण स्वचालित मूल्य प्रणालीअनुसार समायोजन गरिएको निगमको भनाइ छ।
निगमका अनुसार मूल्य समायोजन गर्दा पनि वार्षिक रूपमा अर्बौं रुपैयाँ घाटा व्यहोर्नु पर्ने अवस्था रहेको उल्लेख गरिएको छ। निगमले उपभोक्तालाई पेट्रोलियम पदार्थको प्रयोगमा मितव्ययिता अपनाउन आग्रह समेत गरेको छ।