दार्जिलिङ, पश्चिम बंगाल । भारत–नेपाल सीमावर्ती क्षेत्रमा तेस्रो देशका नागरिकहरूको अवैध आवागमन भइरहेको विशेष सूचनाका आधारमा भारतीय सशस्त्र सीमा बल (SSB) ले विशेष अपरेसन सञ्चालन गर्दै ४ जनालाई नियन्त्रणमा लिएको छ।
सोमबार साँझ करिब ५:३० बजे पश्चिम बंगालको दार्जिलिङ जिल्लाअन्तर्गत नक्सलबारी प्रहरी चौकी क्षेत्रको रतखोला नजिक (BP No. 88/08 आसपास) सशस्त्र सिमा बलको ४१औँ बटालियन, राणीडाँगा अन्तर्गत बी–कम्पनी मदनजोटे टोलीले उक्त अपरेसन सञ्चालन गरेको हो।
अपरेसनका क्रममा टोलीले २ जना थाई नागरिक, १ जना नेपाली नागरिक र १ जना भारतीय नागरिकलाई नियन्त्रणमा लिएको छ। साथै एउटा कार, मोबाइल फोन, पासपोर्ट, आधार कार्ड र राष्ट्रिय परिचयपत्र समेत बरामद गरिएको जनाइएको छ।
पक्राउ परेका थाई नागरिकहरू ४३ वर्षीया नुस्रा किङवान र ३३ वर्षीया साविनी चालासाई रहेको बताइएको छ। प्रारम्भिक अनुसन्धान अनुसार उनीहरू अवैध मार्ग प्रयोग गरी भारत प्रवेश गर्न खोजिरहेका थिए र ‘थाई मसाज’को आवरणमा यौन व्यवसायसँग सम्बन्धित गतिविधिमा संलग्न रहेको आशंका गरिएको छ।
नियन्त्रणमा लिइएका सबै व्यक्ति तथा बरामद सामग्रीलाई थप अनुसन्धान तथा कानुनी कारबाहीका लागि नक्सलबारी प्रहरी चौकीमा बुझाइएको छ। उनीहरूमाथि पासपोर्ट ऐन तथा अन्य सम्बन्धित कानुनअनुसार मुद्दा अघि बढाइने प्रहरीले जनाएको छ।
Nepali