झापामा विप्लवको नाम जोडेर चन्दा आतंक : व्यवसायीहरुलाई पार्टीको नाममा चन्दा नदिन विज्ञप्ति जारी, चन्दा उठाउनेलाई कारबाही गरिने पार्टीको कडा निर्णय
झापा । विभिन्न शिर्षकमा झापामा नेकपा (माओवादी ) को नाम जोडेर चन्दा संकलन भइरहेको गुनासो बढेपछि सम्बन्धित जिल्ला पार्टीले कडा निर्णय लिएको छ । पार्टीले श्रम र आफ्नै उत्पादनमा आधारित गतिविधि गर्दै आएको उल्लेख गर्दै कुनै पनि हालतमा चन्दा नलिने स्पष्ट गरेको छ ।
पार्टी केन्द्रीय निति अनुसार जिल्ला पार्टी असार १० गतेदेखि कृषिमा होमिएको मौका छोपेर केहि मानिसहरुले चन्दाको खेती गरेको भन्दै पार्टीले चन्दा नदिन र कसैले धाक धम्की दिए पार्टीमा सम्पर्क गर्न आग्रह गरेको छ।
पछिल्लो समय झापामा विद्यार्थी संगठन, पार्टी वा अन्य समूहको नाम प्रयोग गरी अनधिकृत रूपमा चन्दा उठाइरहेको गुनासो बढ्दै गएको र यसले पार्टीको प्रतिष्ठामा समेत आँच पुर्याएको भन्दै जिल्ला सचिव सञ्जय सीले वक्तव्य जारी गरेका छन् ।
पार्टी जिल्ला समितिको बैठकले यस्ता छाडा र अराजक गतिविधि पूर्ण रूपमा रोक्ने निर्णय गरेको छ । पार्टीको नाम, ब्यानर वा परिचय प्रयोग गरी कुनै व्यक्ति वा समूहले चन्दा उठाउने कार्य गरेमा त्यसमा सहयोग नगर्न सर्वसाधारणलाई आग्रह गरिएको छ ।
त्यस्तै, डर, धाक–धम्की, प्रभाव वा प्रलोभन देखाएर राजनीतिक आवरणमा चन्दा संकलन गर्ने गतिविधि देखिए तत्काल रोक्न र सम्बन्धित पार्टी सम्पर्कमा जानकारी दिन अनुरोध गरिएको छ ।
जिल्ला सचिव सञ्जयका अनुसार पार्टीकै विभिन्न संगठनमा आवद्ध व्यक्तिहरु समेत चन्दाको धन्दामा लागेको गुनासो आएकाले छानबिन गरि कारबाही गरिने बताए । 
Nepali