मेचीनगर, झापा । मेचीनगर नगरपालिकाले आर्थिक वर्ष २०८२/०८३ का लागि नीति, कार्यक्रम तथा बजेट सार्वजनिक गरेको छ। आजदेखि सुरु भएको दोस्रो नगरसभाको सातौं अधिवेशनमा उपप्रमुख मिना पोखरेल उप्रेतीले एक अर्ब ८२ करोड ६ लाख ८६ हजार ४३९ रुपैयाँ ३७ पैसाको अनुमानित बजेट प्रस्तुत गरिन्।
नगरप्रमुख गोपालचन्द्र बुढाथोकीको अध्यक्षतामा सम्पन्न नगरसभामा प्रस्तुत बजेटमा नगरस्तरीय योजनाका लागि ५७ करोड ९७ लाख ५२ हजार ५४० रुपैयाँ विनियोजन गरिएको छ। वडा स्तरका योजनाका लागि १६ करोड ५० लाख रुपैयाँ छुट्याइएको छ।
संघ सरकारबाट बित्तीय हस्तान्तरणमार्फत विषयगत सशर्त अनुदान अन्तर्गत ८४ करोड ९५ लाख रुपैयाँ प्राप्त हुने अनुमान गरिएको छ। प्रदेश सरकारबाट त्यही शीर्षकमा दुई करोड ६४ लाख ८२ हजार रुपैयाँ प्राप्त हुने उल्लेख गरिएको छ।
त्यस्तै, ऋणको सावाँ र ब्याज भुक्तानीका लागि २५ लाख रुपैयाँ तथा सम्पूरक कोषमा ६ करोड रुपैयाँ विनियोजन गरिएको छ। अघिल्लो आर्थिक वर्षबाट बाँकी रहेको १३ करोड ७४ लाख ५१ हजार ८९९ रुपैयाँ ३७ पैसा पनि समावेश गरिएको उपप्रमुख उप्रेतीले जानकारी दिइन्।
Nepali