मलेसिया । एसिसी मेन्स यु–१६ इस्ट जोन कपको सेमिफाइनलमा नेपालले घरेलु टोली मलेसियाविरुद्ध फाइनलमा स्थान बनाउने अवसर पाएको छ। टस हारेर पहिला ब्याटिङ गरेको मलेसिया ४३.१ ओभरमा मात्र ९० रनमै समेटिएको हो।
मलेसियाका लागि मोहम्मद फतुलले ७१ बलमा सर्वाधिक ३८ रन बनाए। कप्तान डिज पार्तोले ३२ बलमा १० रन जोड्दै पवेलियन फर्किए। बाँकी कुनै पनि ब्याटरले दोहोरो अंकको स्कोर बनाउन सकेनन्।
नेपालका लागि बलिङमा अभय यादवले सर्वाधिक ४ विकेट लिए भने शुभम खनालले ३ विकेट झारे। कप्तान विपिनप्रसाद शर्मा र सचिन भट्टले समान १-१ विकेट हात पारे।
नेपाल समूह ‘ए’ को विजेता र मलेसिया समूह ‘बी’ को उपविजेताको रूपमा सेमिफाइनलमा प्रवेश गरेका थिए। नेपालले समूह चरणका चारै खेलमा जित हात पारेको थियो भने मलेसियाले चारमध्ये तीन खेल जितेको थियो।
गत संस्करणको फाइनलमा पनि नेपालले मलेसियालाई हराउँदै उपाधि जितेको थियो, जसमा नेपाल २२१ रनले विजयी भएको थियो।
यस खेलको विजेता दोस्रो सेमिफाइनलको विजेतासँग उपाधिका लागि प्रतिस्पर्धा गर्नेछ। दोस्रो सेमिफाइनलमा हङकङ र सिंगापुरबीच खेल जारी छ।
एसियाली क्रिकेट परिषद् (एसीसी) द्वारा आयोजित प्रतियोगितामा नेपालसहित १० राष्ट्र सहभागी छन्। सहभागी टोलीहरू दुई समूहमा विभाजित छन्। प्रतियोगिताको फाइनल खेल आगामी जुलाई ५ (असार २१ गते) हुने कार्यक्रम छ।
Nepali