ताप्लेजुङको सिदिङ्वामा चट्याङ लाग्दा एकको मृत्यु, एक घाइते

ताप्लेजुङ। सिदिङ्वा गाउँपालिका–३ मा चट्याङ लागेर एक जनाको मृत्यु भएको छ भने अर्का एक किशोर घाइते भएका छन्।

मंगलबार साँझ घरमै बसिरहेको अवस्थामा चट्याङ लागेर गम्भीर घाइते भएका राजकुमार लिम्बूको साब्लाखुस्थित स्थानीय स्वास्थ्यचौकीमा उपचारको क्रममा मृत्यु भएको हो। पारिवारिक स्रोतका अनुसार चट्याङ लागेपछि उनलाई तत्काल उपचारका लागि स्वास्थ्यचौकीमा पुर्‍याइएको थियो।

त्यसैगरी, सिदिङ्वा गाउँपालिका–५ लिम्बूदिनका १७ वर्षीय मिसन लिम्बू पनि चट्याङ लागेर घाइते भएका छन्। जिल्ला प्रहरी कार्यालय ताप्लेजुङका सूचना अधिकारी विवेक बस्नेतका अनुसार उनको सोही स्वास्थ्यचौकीमा उपचार भइरहेको छ।

प्राकृतिक प्रकोपबाट भएको यस घटनाले स्थानीयवासीमा त्रास फैलिएको छ।