झापा । झापाको बाह्रदशी गाउँपालिका–१ खैरबारीमा भएको सवारी दुर्घटनामा दुई जनाको मृत्यु भएको छ भने आमा–छोरा गम्भीर घाइते भएका छन्।
मंगलबार दिउँसो ३:४० बजे राजगढबाट कुटीतर्फ जाँदै गरेको भारतीय नम्बर प्लेटको BR 37 AZ 6440 मोटरसाइकल र विपरीत दिशाबाट आइरहेको प्रदेश १–०१–०१६ प ९२७० नम्बरको स्कुटर एकापसमा ठोक्किँदा दुर्घटना भएको हो।
दुर्घटनापछि गम्भीर घाइते भएका स्कुटर चालक र मोटरसाइकल चालकलाई उपचारका लागि तत्काल प्रादेशिक अस्पताल, भद्रपुर पुर्याइएकोमा उपचारकै क्रममा साँझ ४:४० बजे दुवैजनाको मृत्यु भएको प्रहरीले जनाएको छ।
मृत्यु हुनेमा कचनकवल गाउँपालिका–३ का ६० वर्षीय श्रीप्रसाद राजबंशी रहेको खुलेको छ। अर्का मृतक मोटरसाइकल चालकको पहिचान भने खुल्न बाँकी छ।
स्कुटरमा सवार मृतकको बुहारी २७ वर्षीया उर्मिला राजबंशी र उनका ३ वर्षीय छोरा आयुष राजबंशी गम्भीर घाइते भएका छन्। उनीहरूको अवस्था गम्भीर रहेको र हाल उपचारका लागि बिर्तामोडस्थित बीएन्डसी अस्पतालमा भर्ना गरिएको प्रहरीले जनाएको छ।
दुर्घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ। दुवै सवारी साधन इलाका प्रहरी कार्यालय राजगढको नियन्त्रणमा छन्।
Nepali