झापा । टि–ट्वान्टी विश्वकप क्रिकेटको एसियाली तथा पूर्वी एसियाली क्षेत्रीय छनोटमा नेपाल र कुवेत एकै समूहमा परेका छन् । अन्तर्राष्ट्रिय क्रिकेट परिषद (आईसीसी) ले बिहीबार सार्वजनिक गरेको समूह विभाजनअनुसार नेपाल समूह ‘बी’ मा कुवेत र जापानसँग परेको हो ।
यस प्रतियोगितामा कुल ९ टोली सहभागी छन् । सहभागी टिमलाई तीन समूहमा विभाजन गरिएको छ । समूह ‘ए’ मा यूएई, मलेसिया र कतार छन् भने समूह ‘सी’ मा ओमान, पपुवा न्यू गिनी (पीएनजी) र समोआ परेका छन् ।
प्रत्येक समूहको शीर्ष दुई टोलीले सुपर सिक्स चरणमा स्थान बनाउनेछन् । त्यसपछि सुपर सिक्स चरणबाट उत्कृष्ट प्रदर्शन गर्ने शीर्ष तीन टोलीले टि–ट्वान्टी विश्वकपमा स्थान बनाउने छन् ।
आईसीसीका अनुसार समूह चरणका खेलहरू अक्टोबर ८ देखि १० सम्म र सुपर सिक्स चरणका खेलहरू अक्टोबर १२ देखि १७ सम्म सञ्चालन हुनेछन् । विश्वकप एसिया तथा पूर्वी एसिया क्षेत्रीय छनोट अक्टोबर १० देखि १७ सम्म सञ्चालन हुने बताइएको छ ।
Nepali