झापा। प्रधानमन्त्री केपी शर्मा ओली दुई दिने औपचारिक कार्यक्रमका लागि आज गृह जिल्ला झापा आउँदै छन्। भ्रमण अवधिभर प्रधानमन्त्री ओली झापा र इलामका विभिन्न कार्यक्रमहरूमा सहभागी हुनेछन्।
कार्यक्रम तालिका अनुसार प्रधानमन्त्री ओली आज बिहान साढे ११ बजे झापाको बुद्धशान्ति गाउँपालिका–३ स्थित भागिरथा न्यौपाने अस्पतालको उद्घाटन गर्नेछन्। त्यसपछि दिउँसो १ बजे इलामको माई नगरपालिकामा नगर अस्पताल उद्घाटन, सुकुम्बासीलाई धनीपुर्जा वितरण तथा खानेपानी आयोजनाको शिलान्यास कार्यक्रममा सहभागी हुने कार्यक्रम रहेको छ।
त्यसपछि आजै साँझ ओलीले कनकाई नगरपालिकास्थित उद्योग वाणिज्य संघको हलमा आयोजना हुने विशेष समारोहमा सुकुम्बासीलाई जग्गाधनी पुर्जा वितरण गर्नेछन्। आजको रात उनले झापामै बिताउने कार्यक्रम छ।
भोलि (असार २९ गते) बिहान प्रधानमन्त्री ओलीले दमकस्थित पूर्व–पश्चिम राजमार्गअन्तर्गत कृष्णमन्दिर खण्डबाट उत्तरतर्फ मदनडाँगी–ताराबारी डिपो सडकको उद्घाटन गर्नेछन्। त्यसपछि बिहान साढे ११ बजे झापाकै रतुवा खोलामा निर्माण सम्पन्न हुलाकी सडक अन्तर्गतको पुल उद्घाटन गर्ने कार्यक्रम तय भएको छ।
भोलि दिउँसो २ बजे प्रधानमन्त्री ओलीले बिर्तामोडको सिटी सेन्टरमा नेपाल कम्युनिस्ट पार्टी (एमाले) द्वारा आयोजित कार्यकर्ता भेलालाई सम्बोधन गर्ने कार्यक्रम पनि रहेको छ।
त्यसपछि ओली भोलि नै ३:३० बजे एयरपोर्ट पुग्ने र ३:४५ को फ्लाइट मार्फत काठमाडौं प्रस्थान गर्नेछन्।
Nepali