झापा । साफ यू-२० महिला च्याम्पियनसिपको दोस्रो खेलमा नेपालले घरेलु टोली बंगलादेशसँग ३-२ को हार व्यहोरेको छ। खेलको अन्तिम मिनेटसम्म संघर्षपूर्ण प्रदर्शन गरे पनि इन्ज्युरी समयमा गोल खाँदै नेपाल पराजित भएको हो।
पहिलो हाफमै बंगलादेशले २-० को अग्रता बनाएको थियो। खेलको १३औं मिनेटमा सिना जहान शिखाले गोल गर्दै घरेलु टोलीलाई अग्रता दिलाइन्। गंगा रोकायाले क्लियर गर्न खोजेको बललाई शिखाले गोलमा परिणत गरेकी हुन्।
नेपालले बराबरीको अवसर पाएको थियो। तर, २८औं मिनेटमा अनिषा राईको फ्रि-किक क्रसबारमा ठोक्किएर फर्किएको थियो। ३६औं मिनेटमा नेपाली गोलकिपर सुजाता तामाङले बल समाउन नसकेपछि सागोरिकाले दोस्रो गोल गर्दै बंगलादेशको अग्रता दोब्बर बनाइन्।
दोस्रो हाफको सुरुआतमै नेपालकी सिम्रन राई र बंगलादेशकी सागोरिका आपसमा झगडामा उत्रिएपछि रेफ्रीले दुवैलाई रातो कार्ड देखाएर मैदानबाट बाहिर पठाइन्।
नेपालले त्यसपछि पेनाल्टी पाएको थियो। अनिषा राईले पेनाल्टीमा गोल गर्दै खेललाई २-१ मा ल्याइन्। खेलको अन्त्यतिर काउन्टर अट्याकमार्फत नेपालले दोस्रो गोल गर्यो। पुर्णिमा राईको क्रसमा मिना देउवाले उत्कृष्ट फिनिसिङ गर्दै खेललाई २-२ को बराबरीमा ल्याइन्।
तर, इन्ज्युरी समयको १२औं मिनेटमा तृष्णारानी सरकारले गोल गर्दै बंगलादेशलाई ३-२ को रोमाञ्चक जित दिलाइन्।
चार राष्ट्र सहभागी डबल राउन्ड रोबिन आधारमा भइरहेको च्याम्पियनसिपमा नेपालले पहिलो खेलमा भुटानलाई ६-१ ले हराएको थियो। अब नेपालले आफ्नो तेस्रो खेलमा श्रीलंकासँग प्रतिस्पर्धा गर्नेछ। बंगलादेशले भने श्रीलंकालाई ९-१ को फराकिलो अन्तरले हराइसकेको छ।
Nepali