मेचीनगर, झापा । झापाको मेचीनगर नगरपालिकाको आयोजनामा तथा सशस्त्र प्रहरी बल नेपाल नम्बर–२ गण, झापाको समन्वयमा सञ्चालन गरिएको समुदाय विपद् व्यवस्थापन सम्बन्धी १८ दिने तालिम सम्पन्न भएको छ।
नगरपालिकाको सभाहलमा सञ्चालन गरिएको उक्त तालिममा स्थानीय स्वयंसेवक तथा नगर प्रहरी गरी २० जनाको सहभागिता रहेको थियो। तालिममा सशस्त्र प्रहरी बलका प्रशिक्षकहरूले स्थानीयकमार्फत स्थानीय तहमा आइपर्न सक्ने विभिन्न विपद् जोखिम, त्यसको पूर्वतयारी, उद्धार तथा न्यूनीकरणका उपायबारे व्यावहारिक प्रशिक्षण प्रदान गरेका थिए।
तालिम समापनका अवसरमा आज काकडभिट्टा खेलमैदानमा प्रशिक्षार्थीहरूलाई प्रमाणपत्र वितरण गर्नुका साथै तालिमका क्रममा सिकेका सीप र ज्ञानको प्रदर्शनीसमेत गरिएको थियो।
समापन कार्यक्रममा सशस्त्र प्रहरी बल नेपाल वराह बाहिनीका प्रमुख डिआइजी कुमार न्यौपाने, झापा जिल्ला प्रशासन कार्यालयका प्रमुख शिवराम गेलाल, सशस्त्र प्रहरी बल नम्बर–२ गणका गणपति तुलबहादुर भण्डारी, जिल्ला प्रहरी कार्यालय झापाका प्रमुख एसपी राजन लिम्बू तथा मेचीनगर नगरपालिकाका प्रमुख प्रशासकीय अधिकृत अग्निप्रसाद अधिकारीलगायतको उपस्थिति रहेको थियो।
कार्यक्रममा वक्ताहरूले यस्ता किसिमका विपद् व्यवस्थापन सम्बन्धी तालिमहरू नगरस्तरमा मात्र सीमित नराखी वडा तथा टोल तहसम्म विस्तार गर्न आवश्यक रहेकोमा जोड दिएका थिए।
Nepali