भैरहवा । रुपन्देहीको सिद्धार्थनगर नगरपालिका–१० स्थित रोयल कालिङ्गा क्यासिनोमा प्रहरीले छापा मार्दा १९ जना नेपाली नागरिक जुवा खेलिरहेको अवस्थामा पक्राउ परेका छन्।
जिल्ला प्रहरी कार्यालय रुपन्देहीका अनुसार मंगलबार राति करिब ८ बजे लुम्बिनी प्रदेश प्रहरी कार्यालय र जिल्ला प्रहरी कार्यालयबाट खटिएको संयुक्त टोलीले क्यासिनोमा आकस्मिक अनुगमन तथा चेकजाँच गरेको थियो। सो क्रममा क्यासिनोभित्र नेपाली नागरिकहरू जुवा खेलिरहेको भेटिएपछि नगद तथा जुवासम्बन्धी सामग्रीसहित उनीहरूलाई नियन्त्रणमा लिइएको हो।
प्रहरीले जुवा खेलाउन संलग्न क्यासिनो व्यवस्थापन पक्षलाई समेत नियन्त्रणमा लिई आवश्यक अनुसन्धान अघि बढाएको जनाएको छ।
पक्राउ परेकाहरू रुपन्देही, काठमाडौं, ललितपुर, गुल्मी, पर्सा लगायत विभिन्न जिल्लाका रहेको प्रहरीको भनाइ छ।
कारबाहीका क्रममा प्रहरीले नगद रु. ९५ हजार ५ सय, विभिन्न कम्पनीका १७ थान मोबाइल सेट तथा ५० थान क्यासिनो क्वाइन बरामद गरेको जनाएको छ।
घटनाबारे थप अनुसन्धान जारी रहेको जिल्ला प्रहरी कार्यालय रुपन्देहीले जानकारी दिएको छ।
Nepali