भारत । कोलकातामा भाजपा नेता सुवेन्दु अधिकारीका पीए चन्द्रनाथ रथको गोली हानी हत्या भएको छ। भर्खरै सम्पन्न विधानसभा निर्वाचनबाट पश्चिम बंगालमा १५ वर्षदेखि नेतृत्व गरिरहेकी ममता बेनर्जीलाई पराजित गरेका अधिकारीका पीए मारिएपछि भारतको राजनीतिक वृत्तमा तरङ्ग पैदा भएको छ।
सुबेन्दु अधिकारीका निजी सचिव चन्द्रनाथ रथ (पीए चन्द्र) को भारतको पश्चिम बंगालस्थित कोलकातामा गोली हानी हत्या गरिएको छ।
भारतीय सञ्चारमाध्यमहरूका अनुसार उत्तर २४ परगनाको माध्यमग्राम क्षेत्रमा बुधबार राति मोटरसाइकलमा आएका अज्ञात आक्रमणकारीहरूले रथ सवार गाडीलाई पछ्याएर बीच बाटोमै रोकेका थिए। त्यसपछि उनीमाथि नजिकैबाट अन्धाधुन्ध गोली प्रहार गरिएको बताइएको छ।
आक्रमणकारीहरूले चार राउण्ड गोली चलाएको प्रारम्भिक अनुसन्धानबाट खुलेको छ। तीमध्ये तीन गोली रथको टाउको, छाती र खुट्टामा लागेको प्रहरीले जनाएको छ। गम्भीर अवस्थामा रहेका उनलाई तत्काल नजिकैको निजी अस्पताल पुर्याइएको भए पनि चिकित्सकहरूले मृत घोषणा गरेका थिए।
घटनापछि सम्पूर्ण क्षेत्रमा उच्च सुरक्षा सतर्कता अपनाइएको छ। प्रहरीले हत्या योजनाबद्ध रूपमा गरिएको आशंका गर्दै सीसीटीभी फुटेज, प्रत्यक्षदर्शीको बयान तथा घटनास्थलबाट संकलित प्रमाणका आधारमा अनुसन्धान अघि बढाएको जनाएको छ।
भाजपा नेता सुवेन्दु अधिकारी निकट व्यक्तिको हत्या भएपछि पश्चिम बंगालको राजनीति पुनः तातेको छ। घटनालाई लिएर विभिन्न राजनीतिक वृत्तमा तीव्र प्रतिक्रिया आउन थालेको भारतीय सञ्चारमाध्यमहरूले उल्लेख गरेका छन्।
Nepali