सिलिगुडीमा रेल दुर्घटना ७ जनाको मृत्यु, कयौं घाइते

झापा । भारतको पश्चिम बङ्गालस्थित दार्जिलिङमा आज सोमबार बिहान रेल दुर्घटना हुँदा ७ जनाको मृत्यु भएको छ । सिलीगुडीको रंगापानी स्टेसन नजिकै भएको रेल दुर्घटनामा परी अहिलेसम्म ७ जनाको मृत्युको भारतीय सञ्चारमाध्यमले जनाएको छ । मृतक तथा घाइतेहरूको सङ्ख्या अझै बढ्ने सक्ने अनुमान गरिएको छ ।

प्राप्त सुचना अनुसार सोमबार बिहान करिब ९ बजेको समयमा न्यु जलपाईगुरी रेल्वे स्टेसनबाट छुटेको कञ्चनजंगा एक्सप्रेस (१३१७४)लाई एउटा मालगाडी रेलले पछाडिबाट ठक्कर दिएको थियो ।

कलकत्ता जाँदै गरेको कञ्चनजंगा एक्सप्रेस रातो सिङ्गलका कारण रोकिरहेको थियो । सोही बेला पछाडिबाट आएको मालगाडी रेलले ठक्कर दिएको थियो ।

ठक्करबाट यात्रु बोकेको कञ्चनजंगा एक्सप्रेस तीन वटा डिब्बा क्षतिग्रस्त भएको छ । घटनास्थलमा एक जना कोपो पाइलटको मृत्यु भएको छ । अहिले उद्धार कार्य जारी रहेको जनाइएको छ । घटना दुखद भएको बंगालका मुख्यमन्त्री ममता बेनर्जीले जानकारी गराउँदै उद्धार तथा राहत कार्यमा जुट्न अपिल गरेकी छिन् ।