मेचीनगर। झापामा तीन जनामा कोरोना संक्रमण पुष्टि भएको छ । नयाँ भेरिएन्ट फैलिन थालेपछि पहिलोपटक गत जेठ ११ गते बिर्तामोड–५ की ५२ वर्षीया महिलामा संक्रमण देखिएको थियो । त्यसपछि काँकडभिट्टा नाका हुँदै नेपाल प्रवेश गरेका दोलखाका ४७ वर्षीय पुरुषमा र तीन दिनअघि मेचीनगर–९ का ४३ वर्षीय पुरुषमा संक्रमण पुष्टि भएको हो । संक्रमित तीनै जनालाई आइसोलेसनमा राखिएको छ ।
यसैबीच, नयाँ भेरिएन्ट फैलिएयता देशमै पहिलोपटक कोरोना संक्रमणबाट इलामकी एक महिलाको मृत्यु भएको छ । सूर्योदय नगरपालिका–१०, फिक्कलकी ४९ वर्षीया महिलाको नोबेल शिक्षण अस्पताल विराटनगरमा उपचारका क्रममा मृत्यु भएको हो ।
उनी ज्वरो आउने लक्षण देखिएपछि स्थानीय अस्पतालमा उपचार गराइरहेकी थिइन् । स्वास्थ्यमा सुधार नआएपछि दुई दिनअघि उनलाई बिर्तामोडस्थित बिर्ता सिटी अस्पतालमा ल्याइएको थियो । सोमबार गरिएको परीक्षणमा कोरोना पुष्टि भएपछि थप उपचारका लागि विराटनगर लगिएको थियो । हिजो बिहान ६ बजे उपचारकै क्रममा उनको मृत्यु भएको हो ।
इपिडिमियोलोजी तथा रोग नियन्त्रण महाशाखाका अनुसार, २०८० साल वैशाख २१ गतेपछि यो पहिलो पटक कोरोना संक्रमणका कारण कसैको मृत्यु भएको हो ।
महाशाखाको तथ्याङ्क अनुसार पछिल्लो २४ घण्टामा सात जनामा कोरोना संक्रमण पुष्टि भएको छ, जसमध्ये एक जनाको मृत्यु भएको हो ।
पुषयता हालसम्म देशभरका २५ जिल्लाबाट १८७ जनामा संक्रमण देखिएको छ । संक्रमितमध्ये सबैभन्दा धेरै बागमती प्रदेशमा १४७ जना, कोशी प्रदेशमा सात, मधेस प्रदेशमा पाँच, गण्डकी प्रदेशमा तीन र सुदूरपश्चिम प्रदेशमा २१ जना रहेका छन् ।
Nepali